شهر مايو من كل عام .. فاضل كام يوم ع الإمتحان .. وأنا لسه مافتحتش كتاب .. الكتب والمذكرات متلتلة قدامي عمال أبصلها زي الأب اللي عنده سبع عيال .. وبيأخد 97 جنيه وخمسة وتلاتين قرش في الشهر ومش عارف أأكلهم مننين ؟؟ قصدي .. مش عارف حذاكرهم إزاي ؟؟ الأيام بتجري أبص ألاقي نفسي ليلة الإمتحان .. عايز أنام بس مفيش وقت .. عايز أقوم أكل بس مفيش وقت .. عايز أقوم أعمل زي الناس بس برضه مفيش وقت .. قاعد ع الكتاب عايز أدخل كل المعلومات اللي فيه جوه نفوخي زي اللي عايز يدخل جمل في خرم إبرة
مفيش حاجة راضية تخش .. اهز دماغي يمين شمال برضه مفبش حاجة راضية تخش .. أضربها في الحيطة ومفيش فايدة .. شربت شاي لغاية ما جالي إمساك وداخل علي شرخ .. الله يخرب بيت العلام ع اللي بيتعلموه .. يعني اللي اتعلموا كانوا أخدوا إيه ؟؟ كلهم قاعدين بالشهادة وبالشرخ !!
أقرر أخيرا أن أنام من واحدة ونص إلى واحدة ونص وخمسين ثانية عشان أقدر أكمل مذاكرة للصبح .. لكن تروح علي نومة لغاية واحدة ونص وخمسة .. أقوم أصرخ : يا ماما حرام عليك أنا مش قولتلك صحيني .. تجيب في انكسار : يابني أنت صعبت علي قولت أسيبك تريح شوية ..يمر الوقت سريعا
السابعة صباحا ..
مش شايف قدامي و عايز نقالة تشيلني وتوديني لجنة الإمتحان .. أنزل في الشارع أترنح زي ما أكون ضارب بانجو أركب بجوار السواق بالمشروع .. وأطلع حاجة أراجعها .. فيقول لي الكلمة المشهورة " اللي ذاكر ذاكر زمان " فأرد بسخرية " واللي ذاكر زمان نسى " لكنه يستطرد : هو أنتم جايين تذاكروا دلوقتي .. أجيبه : معلش يا عم الدكتور.
أصل إلى الكلية أدخل إلى اللجنة بعد تفتيش ذاتي ..زي ما تكون لجنة كمين !!
وطبعا زي كل سنة الورق بيجي متأخر بعد ما يعدي نص الوقت .. وبرضه زي كل سنة مش حيرضوا يزودا لنا الوقت .. المراقب حيوزع الورق ..و زي ما يكون شغال في "بيج بين " يقعد يعد باقي من الزمن ساعة .. باقي من الزمن ساعة إلا خمسة ..ساعة إلا عشرة .. ساعة إلا .....
أصرخ : حد يطفي المنبه ده .. ف الآخر اتغابى وأقوم أضربه
يتلغي امتحاني وأتكرش م اللجنة ..
بس أحلى ما في الموضوع إن بعد ده كله أروح البيت عشان أنااااااااااااااااااااااااااااااااااااااااااااام
مش قلتلكم.. i hate exam