(زمن سيد المعجبانى) _عايز رئيكم بجد بنات او شباب

موضو ع النهاردة عبارة عن قصة او فيلم او لمحة من زمن فات اتمنى تقروها كويس لانى ها........خلى الكلام بعد ما نقراء الموضوع
تعالوا نشوف مع بعض

زمن سيد المعجبانى
****ـــــــــ****
سيد المعجبانى شاب فى مقتبل العمر حاصل على الباكلوريا ويعمل فى احد وظائف الحكومة يتيم الابوين وحيد ليس لة اخوة.على خلق محبوب من الجميع .كل من تبقى من عائلتة
هى خالتة ام محمودوكان دائم التودد اليها وكانت بتعزة جدا زى ابنها واكثر. ، المعجبانى لقبة لسببين
اسم العائلة ولانة معجبانى فعلا انيق لبق منظم
المهم فكر سيد فى يوم انة يتجوز ولية لاء كل اصحابة اللى خاطب واللى اتجوز وكدة وكمان زهق من الوحدة علطول راح ياخد رائ خالتة ام محمود وراح زارها فى البيت وحدث الاتى .

الباب بيخبط ترد ام محمود * مييييييين مين برة
سيد* انا سيد ابن اختك
ام محمود* سيد ازيك ياواد وحشتنى كدة بقالك جمعة بحالها ما جتش اخص عليك
سيد* معلش والله كنت ناوى اجيلك من امبارح بس زى ما تقولى كدة فى موضوع عايزك فية
ام محمود * خير ياواد ولا اقولك استنى انا عندى محشى اجبلك تاكل تلاقيك ما تغدتش حاكم انا عارفاك
سيد ضاحكا * يا خالتى والله انا مش جعان هوة انا غريب يعنى وبعدين ممكن اشرب القهوة بتاعتك واحنا بنتكلم
ام محمود ** من عنيا يا واد والله انا اول ما بشوفك با شوف المرحومة اختى الله يرحمها واموات المسلمين جميعآ
سيد * امين يارب
ام محمود* ياللة اتكلم انا سمعاك وادى عدة القهوة جنبى اهى خير بقى ؟
سيد* بصراحة كدة يا خالتى انا فكرت اتجوز وانتى عارفة انا ماليش حد غيرك اروح لة وكمان كلام فى سرك
انا مش مطمن لبنات الايام دى وانتى بقى امى التانية وايد ها تلاقى عروسة تناسب ابو السيد حبيبك ولا اية؟
ام محمود * هههههههههههههههه يخرب عقلك يا واد يا سيد اخيرا فكرت تتجوز والنبى يا سيد ومن نبا النبى نبى انا لو عندى بنت ما كنتش اسيبك يابن الغالية يا غالى
سيد ** تعيشى يا خالتى ربنا يخليكى ليا
ام محمود** طب قولى بقى انت جاهز ولا تحب اساعدك فى حاجة ما تتكسفش يا واد احنا اهل
سيد** يا خالتى يا ام محمود ما نتى عارفة اللى حيلتى وبعدين انا الحمد لله معايا محوش يجى الفين جنية وشقتى اللى ورثتها والوظيفة والحمد لله ثم انا مش عايز واحدة تقولى كانى ومانى انتى ست العارفين امال انا جت لك لية ؟
ام محمود ** عداك العيب يابنى اصل المواضيع دى بقت غالية اوى مهر وشبكة وعفش وفرح بس عايزة اسال سؤال يا سيد؟
سيـــد** اتفضلى يا خالتى اسئلى
ام محمود ** لية عايزنى اخطبلك مع انكم يا شباب الايام دى اللى بيحب زميلتة فى الشغل او بنت الجيران او اللى كانت معاة ايام المدرسة عايزة اعرف دى
سيد * ههههههههههههههههه ها قول تانى ، يا خالتى انتى لما اتجوزتى عمى ابو محمود كنت تعرفية ولا امى كانت تعرف ابويا ؟
ام محمود ** الكدب خيبة انا شفت عمك ابو محمود مرة كان جة مع ابوة لجدك زيارة وبعدها لقيتهم جايين يطلبونى
ونفس الحكاية مع امك وابوك الله يرحمهم.بس لية يعنى؟
سيــد ** اقولك لانى ما خبيش عليكى انا باشوف ومن غير قصد والله معظم بنات الجيران واقفين فى الشبايك زى ما يكونوا منتظرين الخطاب ودى طبعا شكلها مش حلو
واللى معايا فى الشغل عايزين يفضلوا فى الشغل حتى بعد الجواز وفى موضة طالعة جديد اسمها المساواة بين الراجل والمراءة .ودة برضة مش كويس ومعظمهم مش بيعمر فى بيوت . انا باشوف كتير يا خالتى بس انا عايز واحدة تراعى ظروفى تعيش معايا على الحلوة والمرة طيبة وبنت حلال وعايزة تعمر بيتها با ختصار زيك وزى الجيل بتاعكم ها فهمتينى بقى ؟
ام محمود ** ياة والله فرحتنى يا واد يا سيد بكلامك دة اسمع انا بكرة هاروح كام زيارة كدة لناس قرايبنا وانشاء الله مش هارجع الا ومعايا العروسة
سيد ** ربنا ما يحرمنى منك يا خالتى ريحتى قلبى
ام محمود** ما تاخدنيش فى دوكة يا واد انت استنى شوية ابو محمود زمانة راجع نتعشى سوا وبالمرة اخد رئية
سيد**معلش يا خالتى اتكلمى انتى معاة وانا هاروح علشان عندى شغل جايبة اخلصة فى البيت وخلى العشا دة بعدين المهم اوعى تنسنى ههههههههه
ام محمود ** ماشى يابن الغالية على راحتك وربنا يقدم ما فية الخير
سيد ** انشاء الله سلام انا بقى
وروح سيد المعجبانى على بيتة وهوة بيفكر يا ترى ممكن يلاقى فى الزمن الاغبر دة البنت اللى بيدور عليها
رمى اتكالة على الله وسكت وفضل يستنى اللى جاى
وبعد يومين بيفتح الباب بص لقى خالتة ام محمود لسة ها تخبط علية رحب بيها ودخلت ودار الاتى.
ام محمود ** خلاص يا سيد لقيتلك حتة عروسة تقول للقمر قوم وانا اقعد مطرحك
سيد** بجد يا خالتى
ام محمود ** وحياة خالتك هههههههه
سيد ** طب مين هى ومنين و...
ام محمود ** اصبر بس على رزقك.تعرف الحج حسن صاحب محل العطارة اللى كان ساكن جارنا زمان فى السيدة
سيد ** الحج حسن اه اة افتكرتة مش دة اللى حطلى بن على دماغى لما اتعورت زمان وانا بلعب كورة مع ابراهيم ابنة
ام محمود ** اسم الله عليك اهوة هوة دة
سيد ** بس لما مشى ما كانش عندة ولاد غير ابراهيم ؟
ام محمود ** يوة يا سيد انت كان عمرك وقتها 8 سنين دة ربنا كرمة ببنتين تانى وكانت مراتة دايما تزورنى وازورهها
بس من ساعة ما تعبت بطلت تيجى زى الاول وانا كامان رجلى خفت شوية بس اعرف ان بناتها شايلنها شيل
سيد ** المهم يا خالتى
ام محمود ** شوف الواد طيب يا سيد هههههههههه بص يا سيدى. الكبيرة اتجوزت من سنة اما الصغيرة لسة بس بسم الله ماشاء الله بنت زى القمر وست بيت شاطرة ومؤدبة وشها مش بيترفع من الارض وكمان قليلة كلام مع انها زكية وكمان اية معاها اعداية كمان وبتعرف تقراء وتكتب زى اللهلوبة والله يا سيد اول ما عينى وقعت عليها المرة دى قلت بس هى دى اللى يستاهلها ابن اختى
سيد ** كلام جميل بس ........
ام محمود ** لا اوعى تقول كلمة دى بنت ناس ابوها يعرف ربنا وامهم ست ولا كل الستات وربوا ولادهم احسن تربية .وان كان على اصلهم ان مش تاية عنهم اصل وفصل وناس اى حد يتمنى يناسبهم
سيد ** هههههههههههههههههه خلاص يا خالتى هوة انا فتحت بقى
ام محمود **انا فاتحتهم فى الموضوع على طول خفت استنى البت تطير من ايدى ودة نصيب ما حدش يعرف المقسوم
واول ما عرفوا انك انت العريس فرحوا اوى و...
سيد ** فرحوا اوى لية يعنى مش عريس زى اى عريس والسلام
ام محمود ** يا سلام عليك انت انت ناسى يا واد انك من عائلة المعجبانى ( على اساس انها عيلة ذات سمعة كويسة ) وكمان انت عريس لقطة يا منيل
سيد ** ههههههههههههه لقطة ازاى يعنى ؟
ام محمود** انت وحدانى يا كبدى عليك لا اب ولا ام يعنى
البنت مش ها يكون لها حما تطلع عنيها او تدخل بينكم فى الكبيرة والصغيرة فهمت بقى لقطة لية
سيد** والله اول مرة اعرف انى عريس لقطة فعلا_
ويستمر فى الضحك
ام محمود ** طب اسمع انا فا تحت ابو محمود وهاروح علشان ابلغة اخر الاخبار وكمان اعمل حسابك يوم الجمعة الجاية بعد المغرب ها نروح كلنا بصفة رسمية نطلبها من ابوها. اة حاكم اللى فات دة كلام ستات
سيد ** يا ام محمود عيب تقولى كدة انتى بميت راجل
ام محمود ** طب بطل بكش بقى وسيبنى اروح اشوف حالى يالله سلام اشوفك عريس يا رب
ومن نفسها فقعت حتة زغروطة وروحت
ابو السيد بقى فرح اوى من الكلام اللى سمعة دة وقعد يتخيل شكل العروسة اللى لسة ما شفهاش ومستنى يوم الجمعة علشان يكمل فرحتة
** وفى اليوم المحدد راحو اتفقوا وسيد شاف عروستة اللى دخلت مكسوفة حطت صنية القهوة وجريت تانى برة
بس طبعا بعد ما شافت سيد كدة من غير ما ياخد بالة
الايام مرت الجهاز وكل حاجة خلصت اتعمل الفرح دخل سيد على عروستة اللى شافها بعد الخطوبة يمكن اربع مرات واتكلم معاها كلام لا يذكر بس شعر انها فعلا دى الانسانة اللى بيدور عليها حتى هى شافت فى ابو السيد انة فارس الاحلام ما تنسوش انة اساسا معجبانى اصلى
بس الحق يتقال سيد عمرة فى يوم ما فكر يزعلها او يجرحها دايما شا يلها جوة عنية
وهى كمان كانت دايما بتحترمة وتقدرة جدا لانهم ببساطة احبوا بعض جدا ربما يكون شىء من عند الله او حب عشرة لكن فى النهاية الحب عايش ما بينهم حتى بعد ما انجبوا اربع اولاد ومازال سيد يفتخر بانة تزوج فاطمة مراتة
وفاطمة بتفتخر انها اختارت سيد زوج ليها .
############ تمت
ودة كان زمن سيد المعجبانى يا ترى الزمن دة احسن زمن سيد وفاطمة ، ولا زمن النهاردة زمن تامر وشيرين
تيمو( مأ نتم) مع شيري وعايشين قصة حب طحن اخر حاجة وكل عيد فلانتين دى يبعتلها دبدوب علية اسمة واسمها
وهى تشتريلة كوفية من بتوع لا للارهاب اصلها دى اللى طالعة موضة الايام دة ومقضينها بقى ما سجات ورنات
ولو شافت تيمو بيكلم البت علياء تتقهر وهات يا سح فى الدموع وتكلمة على الموبايل مش بيرد اتارى تيمو نفض لها
اصلها طلعت بت خنيقة اخر حاجة يا عم كبر الجى وهى تانى يوم تنسى تيمو واللى خلفو تيمو وتأنتم مع وائل عاتى بقى
اصل هوة اللى بداء ونفض خلاص انسى بقى يا ابو الاداهيم
##########
يا رب اتمنى يكون الموضوع دة اثار انتباهكم عايز ردود جامدة وارء البنات والشباب بمنتهى الامانة
بس بجد بجد الحكاية مش لذيذة
********


hero abdo
[ندعوك للتسجيل في المنتدى أو التعريف بنفسك لمعاينة هذه الصورة]

تسلم يا عبدوا
اللى انتا شايفوا اعملوا
ههههههههههههههههههههه
احنا فى زمن شعبان
عبد الباسط يا عبدو
تامر وشرين دول لفافى
ههههههههههههههههههههه

تسلملى على ردك تم تم

الله ينور عليك يا عبده بس المره الجايه
عاوزين منك حاجه كول كده يامان
مودى