- يعني يا ابو بخت مايل. ما لقيتش غير زريبة العمدة.

بيقول لك عمدة بلدنا مبسوط قوي من الراجل اللي مسكه بيسرق البهايم من داره السنة اللي فاتت!! الصيف اللي فات غفير الزريبة سمع صوت غريب في الزريبة الساعة تلاتة بالليل زي ما يكون حرامي. راح نادى للغفر، وصحَّى أهل البلد، وحلق يا وله، حوشي يا بت. هوب مسكوا الحرامي جوا الزريبة. المهم ربطوه جنب البهايم لحد العمدة ما يصحى الصبح يشوف هيعمل فيه إيه.

- يعني يا ابو بخت مايل. ما لقيتش غير زريبة العمدة.
- يا عيني على اللي العمدة هيعمله فيك.
- وكمان غريب ما انتش من أهل البلد.
- والنبي صعبان عليّ من اللي هيجرى لك.

صبح الصباح فتاح يا عليم. والعمدة طلع قدام الدوار بدري على غير العادة. بارم شنباته ونافخ كرشه. وقال: هاتوا لي الحرامي بتاع امبارح يا ولاد. في ثانية كانت البلد اتلمت تشوف اللي هيجرى للحرامي الغريب اللي جاي يسرق زريبة العمدة. جابوا الحرامي مدلدل. بص له العمدة بصتين وهز دماغه، وقال له:

- إنت اتجننت يا ولِه؟؟ الحرامي بص في الأرض وما ردش.
- إنت مش عارف أنا مين يا ولِه؟

بص في الأرض أكتر وما ردش.

- إنت مش م أهل البلد؟

غاص في الأرض وما ردش. قام رد شيخ الغفر وقال:

- لا يا حضرة العمدة مش من أهل البلد. وهو حد من أهل البلد يستجري يعمل كده؟!!
- إنت منين يا ولِه؟؟
- أنا من البلد اللي ع الشط التاني.

وأطبق الصمت على المكان برهة. وندت عن العمدة هزة عصبية لا إرادية. وسرت في أجساد الغفر قشعريرة بل رجفة. وفغر العامة أفواههم ببلاهة. قام حسن افندي. الراجل المدرس ده. قام وقال: وكمان غريب وجاي تتجرأ على بلدنا. ده لازم يكون عقابه شديد يا عمدة.

رد العمدة وصوته مبحوح وقال: هه؟ آه طبعا طبعا يا حسن افندي. أنا لازم أشوف هااعمل إيه. المهم يا له انتوا كل واحد على غيطه دلوقتي.

وفرّق الغفر الناس. وانفرد العمدة بالحرامي. ويا اخويه سكتم بكتم على حكاية السرقة دي.يومين وسمعنا إن الواد الحرامي هيسكن معانا في البلد! والعمدة إداله دار أم منصور بدل ما هي عايشة لوحدها وهي تروح تعيش مع أيتها حد. مش دا كرم ضيافة برضه ولا إيه؟؟!! ويومين ولقينا الراجل بيزرع في حتة الأرض بتاعة الواد مبروك اليتيم. ومبروك يروح يعيش حتى مع أبوه!!!. والعمدة إداله كام جاموسة كانوا في الداور ما يعرفش بتوع مين!!!!.الناس بقت تضرب كف على كف!!!!! دا كله عشان طلع قريب "داوود" شيخ الغفر بتاع البلد اللي ع الشط التاني. صحيح "داوود" شيخ الغفر بتاع البلد اللي ع الشط التاني قادر ومتفرعن وسايب قرايبه عمالين يبرطعوا في أموال الناس. بس ازاي العمدة بتاعنا يطاطي له كده. أهو دا اللي أنا مش فاهمه!!.وآهي فاتت سنة والناس كلها لسه مستغربة.
محاصيلها وبهايمها وبيوتها عمالة تتسرق. وعيالها بتتخطف. دا حتى حسن افندي الراجل السكرة بيقولوا مسكوه بيشرب سجاير ف الفصل وحبسوه خمس سنين. والحرامي -قصدي سعادة الباشا- عمال يتنفخ. ويغتني. وأرضه تزيد. وبهايمه تكتر. والفيلا بتاعته دلوقتي بقت أكبر من دوار العمدة عشر مرات.
وامبارح لسه امبارح. العمدة كان بيهنّيه على مرور سنة على دخلته السعيدة لبلدنا.

[ندعوك للتسجيل في المنتدى أو التعريف بنفسك لمعاينة هذه الصورة]

تسلم الايادى

» وحيد العمدة الفرح بتاعنا
» أن تبتسم.....لا يعني انك لاتحمل هماً