نفسك تكلم البنت اللي بتحبها ومش عارف .. حلك عندي ..

[ندعوك للتسجيل في المنتدى أو التعريف بنفسك لمعاينة هذه الصورة]

ازيكم يا احلي اعضاء ..

مشلكة انك لو معجب بواحدة ومش عارف تقولها .. او لو انت بتكسف ومش بتعرف تكلم بنات ونفسك تكلم البنت اللي معجب بيها .. طبعا بتقعد تحضر في الكلام قبل ما تقابلها بشهر ونص وتمثل مع اصحابك والكلام ده كله زز انا هساعدك واديك حلول كويسة .. بس فيه شرط واحد ..

ياريت اللي يقرأ الموضوع يكون بجد عاوز يحب مش عاوز يتسلي بواحدة يومين و ينفضلها لان كلنا عندنا اخوات بنات وقرايب بنات ومنحبش حد يعمل كده معاهم ..

اول حاجة كده في السريع الحاجات اللي لازم تبعد عنها قدام البنت اللي انت معجب بيها ..

1) اوعي تشرب سجاير لانهم مش بيحبوا المدخنين

2) بلاش تشتم كتير حتي مع اصحابك على سبيل الهزار

3) متقفش مع بنات كتير لانهم بيحبوا الولد الخام البرئ الطيب .. حتي لو انت مقطع السمكة وديلها .. ساعتها ابقا ركز معاها بس

4) تبقي واقف مع اصحابك مثلا وبتتكلم وتفضل تبص عليها لو عنيها جت فيك هي هتبص النحية التانية .. ساعتها يبقي حاجة من تلاتة ..

1) ياما بنت دي خبرة وفاهمة الحوارات دي وبتتقل او بتعمل نفسها محترمة
2) او البنت دي انت مش في دماغها ومعتبراك كلب وبتبص عليها
3) او البنت دي معجبة بيك فعلا ومكسوفة

5) بالرغم انك متعرفهاش خالص لو لقتها واقفة مع ولد عدي جنبها كده وانت بتبص عليها لو بصت عليك الوي وشك واعمل انك غيران وامشي لاخر الشارع .. ده هيبين انك مضايق من كده

6) متخليش رد افعالك مبالغ فيها

7) حاول تبقي شيك في كل حاجة .. لبس كاجوال .. شعرك متظبط ( بلاش جيل عشان بيحسوا انه مبالغ فيه ) .. كوتشي ابيض .. او جزمة سودا بتلمع .. البنطلون ميبقاش فيه تراب خالص

8) خليك انعزالي معظم الوقت عشان لو حصل .. لو حصل وجت كلمتك متكسفش من حد انت بتبقي واقف معاه

شوية نصائح مهمة

في نوعين من البنات ..
واحدة تبص لشكل الولد الاول ( وسيم ولا لأ ) وبعدين الشخصية .. يعني الشكل الاساس

وواحد تانية تحب تشوف الشخصية وميهمهاش الشكل ..

فانت لازم تتأكد انها معجبة بيك .. يعني مثلا وانت واقف مع صاحبك جنبها .. خلي صاحبك يركز ويشوف هي بتبص عليك ولا لأ .. مركزة معاك ولا ايه بالظبط .. لو كانت بتبص ومركزة يبقي دوس يا معلم ..

لو انت في كلية قولها عاوز كشكول المحاضرات وهديهولك بكرة .. هتقولك ماشي .. تاخد الكشكول .. وتاني يوم تديهلوها وتقولها نقلت كل حاجة ( وطبعا انت قاعد تبوس في الكشكول و نايم والكشكول في حضنك ولا نقلت ولا اتهببت ) وقولها خطك حلو اوي .. هتقولك ميرسي وهتمشي وتسيبك .. كده تمام اوي .. ايام الامتحانات بقا .. روح قولها عملتي ايه في الامتحانات وكده .. ولو لقيت تجاوب يعني مثلا لو سألتها عملتي ايه هتقولك الحمد لله لو سكتت يبقي هي مش طايقاك لو سألتك وانت عملت ايه يبقي دوس بقا .. بس تقولها الكلام قدام اصحابها عشان هيقعدوا ينموا عليك ويقولولها انك كده مهتم بيها وهما بيموتوا في كده واخر يوم قولها انك معجب بيها .. لو سكتت قولها انا عارف ان احنا مش عارفين بعض كويس بس انا اول ما شفتك وانا معجب بيكي هتبص هي في الارض قولها فياريت لو رقم الموبايل او الايميل عشان نتعرف .. طبعا هتديك الاميل وتقولك الموبايل لا عشان مش ينفع كده على طوول .. وبكده يبقي قشطة اوي ..

اخر حاجة بقا لو انت معجب ومش هتشفها تاني والكلام اللي فوق منفعش .. اوعي تقول لواحدة صاحبتها انك معجب بيها عشان مافيش بنت هتوصل لبنت احساس ولد نحيتها .. روح قولها انت .. لو لقيت قبول يبقي ربنا بيحبك و متنسانيش .. لو لطشتك بالالم والشارع كله اتلم عليك وضربك .. يبقي ماليش دعوة .. لو سابتك ومشيت افضل وراها لغاية ما تديك بالالم و الشارع يتلم عليك ويضربك

كده عندنا مرحلتين .. مرحلة وانت بتكلمها على الاميل وعمال تدعيلي او مرحلة وانت قاعد متجبس في المستشفي وعمال تدعي عليا وانا مسامحك في التانية

لو على الاميل بقا .. اوعي تكذب عليها .. لاننا متفقين انك هتكون بتحبها بجد مش عاوز تمشي معاها يومين وخلاص .. وبعد فترة قليلة قولها انك بتحبها .. لو شخصيتها عجبتك لو شخصيتها معجبتكش متقولهاش ان شخصيتها وحشة لانها هتقولك ان انت اللي جريت وراها وقعدت تتذللي وانك صعبت عليها و تهذقك .. بس كل الحكاية متكلمهاش خالص و هي هتفهم

يوم عيد ميلادها يوم تاريخي قابلها وهات هدية .. وبلاش فذلكة وتروح تجيب اي هدية كده وخلاص .. دبدوب ابيض و جوه قلب او ماسك قلب ويكون الحجم متوسط .. متجبش دبدوب قدك مرتين .. او الهدية اللي غي الجون بجد تبقي عروسة شوف الفرحة ساعتها في عنيها لما تاخدها .. وابقا ادعيليي ساعتها

متقعدش تسرح بيها وتقولها انا كنت بطل سباحة وكراتيه والاهلي هيشتريني قريب .. خليك متواضيع ومتتكلمش عن نفسك كتير

لو سألتها اي سؤال وقالتلك بتسأل ليه .. قولها بسأل عادي هتلاقيها هتجاوب علي طول

كل لما تقابلها تجيبلها وردة بمناسبة ومن غير مناسبة .. بس متروحش تجيب بوكية ورد .. هي وردة واحد وتكون حلوة كده

لو هتقابلها روح قبل الميعاد بربع ساعة و قولها انا بقالي ساعة مستنيك هييجي واحد بيقرا يقولي احنا مش اتفقنا على الصراحة .. هقولك ماهي مش هتصدقك وهتقولك يا سلام .. تقولها انتي عاملة ايه وتغير الموضوع

متقعدش ساكت كتير وانت واقف جنبها .. اكلم في اي حاجة .. لو ملقتش كلام .. عيد كلام تكون انت قولته قبل كده .. ارغي شوية يا عم الحاج مش هتخسر حاجة

لو الحب من طرف واحد وهو من طرفك اكيد .. ابعتلها اي اغنية كده زي اغنية بحبك ليه بتاعة رامي جمال او اغنية حياتي فداك بتاعة تامر حسني .. لو انتوا الجوز بتحبوا بعض ابعت اغنية اجمل قصة حب لحسام حبيب

متعملش فيها عاطفي ومرهف ولو شفت فرخة بتتدبح يغمي عليك .. خليك بطبيعتك

اول مقابلة هي بتاخد عنك انطباع في كل حاجة .. يعني لو قعد تصرف عليها كتير في اول مقابلة او قابلتها تاني ومصرفتش بنفس الكمية .. هتفتكر انك كنت بتشتغلها وبتعمل كده عشان تلفت انتباهها بس وهتكرهك .. هتقولي هي مقالتش انها بتحبني .. هقولك مافيش واحدة هتلكم واحد على الاميل قالها انه بيحبها ومعجب بيها ومش هتكون معجبة بيه على الاقل .. بس هي بتتقل عليك

لو لقيتها غيرت حاجة في شكلها قولها الله شكلك كده احلي

لما تروح من المقابلة .. قولها الطقم كان عليكي النهاردة تحفة هتقولك ميرسي ..قولها كل حاجة بتبقي عليكي تحفة

لو لقيت الطقم عليها وحش قولها انه حلو بس بتاع يوم الخميس اللي فات كان احلي وهي هتفهم

لو قالتلك كلمة زعلتك .. الوي وشك وبص النحية التانية هتقولك زعلت ؟ .. قولها احسن حاجة انك لما تزعليني بتصالحيني تاني .. هييجي الرخم اللي بيسأل كل شوية وشقولي وهي صالحتني امتي ؟! هقوله ماهي ساعتها هتقول ودي حاجة حلوة .. قولها الحاجة الحلوة انك خايفة علي زعلي .. واوعي لو قالتلك انك زعلت تعمل فيه ومانسي وتقولها انا استحالة ازعل منك .. ساعتها لو فلقت راسك في الحيطة مش هتعبرك

شوف بقا الجاي ده وعيش .. او موت يعني على حسب انت ذكي ولا لأ

لو لقيتها بتعيط لاي سبب بس متكونش انت السبب .. امسح دموعها بايدك مش بمنديل .. بايدك .. ده هيحسسها بالحنان لابعد درجة .. وقولها مش بحبك وانتي بتعيطي .. طبعا هتفضل تعيط .. قولها والله لو ما بطلتي لاقعد فينص الشارع واي عربية تاخدني ويبقي دمي في رقبتك .. هتفضل تعيط لانها هتعتبرك فشار .. ركز بقا والنبي .. اختار شارع ضيق و مافيهوش عربيات كتير واقعد في النص .. هتقولك قوم .. قولها لما تبطلي عياط الاول .. ساعتها ممكن تبطل لو مبطلتش بص بقا الجاية دي .. لو لقيت عربية جاية من بعيد قولها انا هنام واخلي العربية تدوس عليا هتاخد هي بالها وتقولك قوم لو العربية بعيد قوي قولها لما تبطلي الاول لو قريبة قوم وانجو بروحك .. هييجي نفس الرخم يقولي افرد ماخدتش بالها .. هقولك يبقي العربية تخبطك وتموت واستريح منك .. بعد ما تقوم قولها مش بحب اشوفك وانت بتعيطي خالص .. وساعتها بقا قوم جاي عامل كام حركة متهورة بعدها بكام يوم عشان تفهم انك متهور ..

البنت بتحب الولد اللي يضرب اللي يعاكسها وفي نفس الوقت تحب الولد اللي يتضرب عشانها .. هتقولي يعني انا دلوقتي اضرب ولا اتضرب .. هقولك سهلة اوي .. انت تجيب اتنين صحابك يعاكسوها وتطحنهم .. كده انت ضارب 2 في نفس الوقت عشانها .. وبعدين تجيب 8 او 7 من اصحابك يعاكسوها ويطحنوك وبكده هتخاف عليك وتزيد في نظرها انك ضحيت فداها .. وهتقرفك كل يوم مكالمات عشان تتطمن عليك .. بس انت برضو ابقا اربط ايدك و حط كام بلاستر كده عشان تصعب عليها .. بس الكلام ده لو انت مش عارف هي بتحبك ولا لأ .. انما لو عارف متجبش حد ومتعملش حاجة

اول ما تشوفها قولها ايه القمر ده وعاكسها بس معاكسة محترمة خلي كلامك لطيف و مهذب كده

البنت تحب الولد المحترم المتدين اللي لا بيبص لا شمال ولا يمين

حاول تدلعها قدام اصحابها

اوعى تقولها انتى تخنتى ولو هى اللى سالتك حاول تهرب من السؤال

وانت بتكلمها في الموبايل اكلم في مكان لوحدك عشان محدش يكلمك وهي معاك عشان هما بيضايقوا لو حد اخدك منهم

احفظلك كام نكتة علشان البنات بيحبو الولد اللى دمه خفيف

اسألها على افلام رومانسية وبين قدامها انك رومانسي خالص والافلام زي دي
If Only
Titanic
Moulin Rouge
A Walk To Remember
Remeber Me
The NoteBook
Twillight
ركز في الافلام دي اوي

لو انت بقا خلاص عينك عليها وعاوز ترتبط بيها رسمي هاتها بالتدريج .. قولها الاول اذا كانت قالت لاهلها انها بتكلمك ولا لأ .. لو لأ خليها تقولهم .. بعدين اتعرف عليهم .. بعدين اتقدملها .. وعيش

تبعد لها خصلات شعرها التي وقعت على وشها بتديلها انطباع انك مهتم بيها ..

وانتوا ماشيين لو الدنيا مطرت .. حط الجاكت بتاعك عليها . طبعا هيجيلك برد وانفلونزا واحتمال ترقد في المستشفي جنب صاحبنا اللي اجبس فوق .. وتقعدوا تدعوا عليا مع بعض .. بس هي ساعتها هتكلمك تتطمن عليك كل يوم
لو هي غلطانة ومعتذرتش اعتذرلها انت وصالحها

لو لقيتها بتتكلم على واحدة صابحتها وهي مش موجودة اكلم معاها واقعد ارغي شوية .. لانهم بحبوا النميمة

دلعها على طوول قدام اصحابها وبكده تاخد بونت قدام اصحابها ودي حاجة مهمة جدا

متسكش ايديها الا لما تقولك انها بتحبك وتبقي مصدقاك وتبقي ماسكة من تحت لتحت كده يعني متفعصش ايديها في ايدك .. ومتحاولش تقرب منها بطريقة مبالغ فيها .. لو جيت تقرب وهي بعدت متحاولش تاني

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــ

في الاخر خالص .. انا مكنتش اعرف اللي معجب بيها ولا حتي اسمها بس قولتلها اني معجب بيها والحمد لله لان شكلي كويس نوعا ما فكان فيه قبول من نحيتها .. صدقوني الصراحة افضل من انك تتعذب وانت شايفها ومش عارف تكلمها
طلبين بس لو سمحت في الاخر ..

ياريت اللي يقرا الموضوع يكون معجب بجد بواحدة او عاوز يجب بجد مش عايز يتسلي

ياريت اللي نقل الموضوع يقول المصدر لانه تعبني اوي في الكتابة
سامحوني على ا اخطاء املائية او كلام ناقص لان زي مانتوا شايفين الموضوع كبير وكتابته وتأليفه صعب ومتعب

في امان الله ومحدش لو سمحت يسرح بواحدة يومين ويدمر قلبها عشان كده حرام والله :S :S

تسلم ايدك يا حسين نايس توبيك

بجد كلام جميل اوى و احساس جامد

تقبل مرورى و تحياتى

شكراااا لمروك لموضوعى يا همس

شكرااااا لمروك لموضوعى يا سيمو

الله عليك يا حسين احساس عالي جدا

شكرااا لمروك لموضوعى يا ميدو

» عارف لما تحب
» ممكن مساعده عندي مشكله في المنتدى تبعي واريد حل من الادارة
» [ برنامج ] : خراافي .. تكلم من خلال المايك والكمبيوتر يكتب !! برابط واحد مباشر